Тошкент мода ҳафталиги. 3-кун

Ёшлар ижод саройида Тошкент мода ҳафталигининг учинчи куни кўтаринки кайфиятда бошланди. Дастлаб ёш дизайнерлар учун Дина Сайфи ва Маликахон Хабибованинг маҳорат мактаби ташкил этилди. Учинчи кун Anor брендининг маҳоратли дизайнери бўлмиш Дилноза Умирзақова, ҳамда Дилноз Эркиноваларнинг муаллифлик ишлари намойиши ўтказилди. Дизайнерларимиз қандай замонавий тенденцияларни ҳавола этишгани билан мақоламизда танишинг. 

 

Учинчи кун, подиумда ўз ишининг усталари ва ўзбек мода саноатида кўп йиллардан бери ўз ўрнига эга бўлиб кедаётган истеъдодлар ишлари намойиш этилгани билан ажралди.

Илк либослар тўплами Dilnoz бренди асосчиси Дилноз Эркиновадан тақдим этилди.  Унинг либослари гўзаллик шайдоларини назокатлилиги билан қувонтирди.

Тўпламда дизайнер оч ранглардан фойдаланган. Турли рангдаги духоба матосидан тайёрланган курткалар барчада катта таассурот қолдирди. Енгил курткаларнинг бел ва ёқа қисми буғма резинка бўлиб, шим, кўйлаклар билан янада нафислик касб этган. Майда қавилган бу курткаларнинг остида анчайин қўл меҳнати борлигини фахмлаш қийин эмас.

Шолк ва шойи матоларидан яратилган кўйлаклар ёз мавсуми учун жуда қулай. Ортиқча безаклардан ҳоли либосларнинг енг, олд ва этак қисмлари патлар билан безатилган.

Тўплам якунида тақдим этилган келинчак либоси барчанинг эътиборини тортди. Дид билан яратилган бу либос қаймоқ ранг шойи матосидан тайёрланган ва карсет қисми капалаклар билан безатилган. Баъзи маълумотларга қараганда ушбу кўйлак актриса Асал Шодиеванинг никоҳ либоси ҳисобланади.

Коллекцияда жами 60та либос мода ихлосмандлари эътиборига ҳавола этилди.

Дилноза Умирзақовадан тақдим этилган либослар тўплами барчани  ҳашамдорлиги билан лол қолдирди.

Тўқ ранглар, бахмал, тўр, узун юбкалар, миллий элементлар ва соч учун гўзал тақинчоқларни кўриш мумкин бўлди.

Дизайнер замонавий тенденцияларга амал қилган ҳолда плиссировкадан фойдаланиб, шундай юбкалар, кўйлаклар, топларни тақдим этди.

Дизайнерларни оила аъзолари, яқин дўстлари, ҳамда санъатимиз юлдузлари бўлмиш Шаҳзода Муҳамедова, Асал Шодиева, Зарина Низомутдинова, Ойҳон Ифорзода, Дилсўзлар қўллаб-қувватлаш учун ташриф буюришди. 

Dilnoz бренди асосчиси Дилноз Эркинова:

«Ўтган йилги кўргазмада жами 50та либосим билан қатнашган бўлсам, бу йил либослар сонини бироз кўпайтириб, 60 тага етказдим. Коллекциямда замонавийлик ва миллийликни уйғунлаштирган ҳолда ўзимизнинг тоза ипак матоларидан фойдаландим. Либослар асосан, ўсмир ёшдаги қизлар ва ёш аёллар учун мўлжалланган бўлиб, ёз ва баҳор мавсумида учун айни муддао. Мазкур коллекциянинг тайёрланиш жараёни олти ой муддатга чўзилди. Кўпгина либослар 3D гуллар ва турли аксессуарлар билан безатилган бўлиб, барчаси қўл меҳнати асосида яратилган. Ўйлайманки, барчага манзур бўлади».

Дилноза Умирзақова ва Дилноз Эркиноваларнинг муаллифлик либослари тўплами намойишидан тўлиқ фотоҳисоботни сайтимизда кўринг.

Тошкент мода ҳафталигининг иккинчи куни қай тарзда ўтганлиги билан бу ерда танишинг.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.