Грузин киноси кунлари

“Ўзбеккино” Миллий агентлиги ва Грузия Республикасининг мамлакатимиздаги элчихонаси ташаббуси билан жорий йилнинг 18-20 декабр кунлари пойтахтимизда “Грузин киноси кунлари” бўлиб ўтади. Мазкур маданий тадбирнинг тантанали очилиш маросими
18 декабр куни соат 17:00да Республика Киночилар уйида бошланади.
Шу муносабат билан, 11 декабр куни Киночилар уйининг анжуманлар залида “Ўзбеккино” Миллий агентлиги раҳбари Аҳмаджон Умаров ва Грузия Республикасининг юртимиздаги фавқулотда ва мухтор элчиси Константин Жгенти иштирокида оммавий ахборот воситалари вакиллари учун матбуот анжумани бўлиб ўтди. Анжуманда икки мамлакат Ҳукуматлари томонидан маданий-гуманитар соҳаларда амалга оширилаётган ҳамкорлик изчил ривожланаётгани таъкидланиб, 18 декабрдан пойтахтимизда бошланувчи Грузин киноси кунлари бу фикрга яққол далиллиги айтиб ўтилди. 


“Грузин киноси кунлари”да иштирок этиш учун Грузиядан Баадур Цуладзе (режиссёр, актёр, сценарист, бошловчи), Элгуджа Бурдули (актёр, хонанда), Зураб Кипшидзе (актёр), Дали Окропиридзе (киношунос), Георгий Накашидзе (актёр) каби таниқли киноижодкорларнинг ташрифи кутилаётганлиги маълум қилинди.

“Грузин киноси кунлари”нинг дастури:
18 декабр:
17:00 - “Грузин киноси кунлари”нинг тантанали очилиш маросими;
18:00 - 19:30 - “Кето ва Коте” (режиссёрлар: В.Таблиашвили ва Ш.Гедеванишвили);
21:00 - 22:30 - “Биринчи қалдирғоч” (“Первая ласточка” режиссёр: Н.Мчедлидзе)
19 декабр:
12:00 - 13:30 - “Кузги қуёш” (“Осеннее солнце” режиссёр: Т.Палавандишвили);
15:00 - 16:30 - “Верий мавзеси тароналари” (“Мелодии Верийского квартала” режиссёр: Г.Шенгелая);
18:00 - 19:30 - “Бедорлар қуёши” (“Солнце неспящих” режиссёр: Т.Баблуани).
20 декабр;
12:00 - 13:30 - “Якка овчи” (“Одинокий охотник” режиссёр: К.Долидзе);
15:00 - 16:30 - Грузин қисқа метражли фильмлари;
18:00 - 19:30 - “Ошиқ ошпазнинг 1001 рецепти” (“1001 рецепт влюбленного кулинара” режиссёр: Н.Джорджадзе).

“Грузин киноси кунлари” доирасидаги барча намойишлар Республика Киночилар уйида бўлиб ўтиши режалаштирилган. Намойишларга кириш бепул.
 

Манба: uzbekkino.uz