Ўзбек йигити ёҳуд ALI KHAN ким?!

- Нурмуҳаммад, авваламбор илтимосимизни рад этмай, ташриф буюрганингиз учун раҳмат. Сиз билан бўлиб ўтадиган интервьюга тўғрисини айтсам катта тайёргарлик кўрмадим. Чунки сиз ҳақингизда айнан ўзингиздан маълумот олишни истадим. Келинг аввал ўзингиз ҳақингизда маълумот берсангиз.

- Мен 1980 йилда Тошкент шаҳрида туғилганман. Оилада 3та фарзандмиз. Чорсудаги 38-мактабни тамомлаганман. Адашмасам ҳозир ҳарбий мактаб бўлган. Болалигимдан  инглиз тилига қизиқишим кучли бўлган.
- Кино санъатига қандай кириб келгансиз?
​
- 1999 йилда ўқиш мақсадида АҚШга учиб кетдим. Америкада ўзингизга маълум ёшлар ўз кунини ўзи кўришга одатланган. Мен ҳам ўқишдан ташқари вақтларимда ишлаб, ўзимни таъминлаганман. Аввалига 3-4 йил пиццахоналарда пицца ташувчи бўлиб ишлаб юрдим. Орадан вақт ўтиб бир ўзбек дўстим билан ўз пиццахонамизни очдик. Пиццахонада иш юритардим. Иш вақти тугугач 3-4 та ўзбек болалар йиғилиб, суҳбатлашиб ўтирар эдик. Мана шундай суҳбатлашишларнинг бирида миямизга Америкадаги ўзбек талабаларнинг ҳаёти ҳақида кино суратга олиш фикри келиб қолди. Шу пайт бир дўстимиз Беҳзод Муҳаммадкаримовни танишини, ҳозир шу актёр Америкадалигини айтиб қолди. Дарров унга қўнғироқ қилдик. Унга ҳаёлимизга келган ғояни батафсил айтиб, Америкада истиқомат қилаётган ўзбеклар ҳақида фильм олишга қарор қилдик. Сизнинг маслаҳатингиз керак деганимизда, у киши: “Шошманглар, сценарий тайёрми ўзи, фильмингизга ким режиссёрлик қилади, суратга олиш ишлари бюджетини ким қоплайди” деб бир талай саволлар билан бизни кўмиб ташладилар. Хали ҳеч нарса тайёрмаслигини эшитиб, бизга шошилмасдан, аввал сценарий ёзишимиз кераклигини, кейин режиссёр топишимиз лозимлигини, бу биз ўйлаганчалик осон иш эмаслигини айтганларида ҳаммамизнинг тарвузимиз қўлтиғимиздан тушиб, шу билан бу мавзуга бошқа қайтмадик. Лекин шу кундан бошлаб менда актёр бўлиш орзуси уйғонди.


- Орзуни амалга ошириш учун қўйган илк қадамларингиз эсингиздами?

- Албатта. Бир куни Лос Анжелесда яшайдиган танишим билан гаплашиб қолдим. Мен у вақтларда Канзас штатида яшардим. Унга актёр бўлиш ниятим борлигини айтганимда: “Агар актёр бўлмоқчи бўлсанг Голливудга кўчиб келишинг керак, Канзасда туриб актёр бўлиш қийин” деди. Шу билан мен ҳаракатни бошлаб юбордим. Ташқи кўринишимга алоҳида эътибор қаратадиган бўлдим. Тренажер залига бориб тинмай шуғулланардим. Бир йил деганда Канзасдаги пиццериямни ёпиб, пулимни чўнтакка солиб, ўзим умуман билмайдиган шаҳарга орзуларим кетидан равона бўлдим.

- Сизни Голливуд қандай кутиб олди?

- У ерга бориб портфолио қилдим, кейин расмларимни турли кино агентликларига тарқатдим. Орадан ҳеч қанча вақт ўтмай мени эпизодик роллар учун кастингларга чақира бошладилар. Аввалига массовкаларда ишладим, кейин эпизодик ролларда чиқдим. Америкада каттароқ роль ижро этиш учун  “Актёрлар гильдияси” аъзоси бўлиши керак. Мазкур гильдияга аъзо бўлиш учун актёр камида 4 кун катта бюджетли фильмда роль ижро этган бўлиши лозим. Тақдир тақазоси билан ўша пайтда дўстим менга бир фильмда эпизодик роль учун кастинг кетаётганини айтиб қолди, фақат уларнинг шарти бўйича баданимда умуман татуриовка бўлмаслиги керак экан. Мен дўстимга таваккал менинг исмимни ҳам рўйҳатга киритиб қўйишини илтимос қилдим. Омад менга кулиб боққан экан мазкур фильмда кичикроқ роль ижро этиш учун айнан мени танлаб олишди. Ҳар бир суратга олиш ишлари бошланишидан аввал гримёрлар икки соатлаб татуировкаларимни бекитиш учун грим қилар эдилар. Ушбу фильмда 4 кун давомида суратга тушдим, сўнг “Актёрлар гильдияси”га аъзо бўлдим.

- Сизни Голливудда Алихан тахаллуси билан танишади. Нимага айнан Алихан?

- Ўз исмим жуда ҳам узун ва ҳаддан ташқари ўзбекча бўлгани учун америкаликларга ўзимни таништириш қийинчилик туғдирарди. Улар исмимни эслаб қолишлари жуда мушкул, Алихан эса қисқа ва эсда қоладиган. Тана тузилишим ҳам спортчиларникига ўхшагани учун Алихан дейишим билан уларнинг кўз олдига боксёр Мухаммад Али келади ва уларга эслаб қолиш анча осонлашади.

- Келинг энди олдинда бизни кутаётган премьера ҳақида гаплашсак. “Ангел смерти” фильмида бош роллардан бирини ижро этгансиз. Фильм режиссёри эса Баҳодир Йўлдошев. Ҳозирча бизда бор маълумот шу. Тўлиқроқ маълумотни сиздан олсак.

- Мазкур фильмда Голливуддан ташқари, Ўзбекистонлик, Қозоғистонлик, Россия ва Украиналик актёрлар ҳам иштирок этган. Улардан Арман Ассантэ, Игорь Савочкин, Малика Раззакова, Максим Акбаровларни санаб ўтишим мумкин. Ўзимизнинг актерлардан эса Улуғбек Қодиров, Фаррух Соипов, Самандар Ҳамроқулов ва яна кўплаб актёрлар фильмда катта кичик ролларни ижро этишган. Фильм премьераси 64та давлатда ўтказилиши режалаштирилмоқда. Ҳозир фильм тўлиқ суратга олиб бўлинди, ўзбек ва рус тилларида овозлаштирилди, эндиликда инглиз тилида овозлаштириш ишлари кетяпти. 
- Сиз билан суҳбатларимизнинг бирида ҳозирча ўзбекча кинода суратга тушмайман деган фикрни билдирган эдингиз. Лекин интернетда “Арслон изидан” деб номланган фильм постерларида сизни кўриб турибмиз.

- Тўғри аввалига ўзбекча кинода тушиш менинг режаларимда йўқ эди, лекин укамдек бўлиб қолган Азиз Раметов илтимосига кўра мазкур кинода суратга тушдим. “Арслон изидан” ўткир сюжетли фильм. Тез орада премьераси бўлиши кутилмоқда. Сизларга ёқади деган умиддаман.
- Сиз аксарият фильмларда салбий образларни яратасиз. “Ёмон бола” образида қотиб қолишдан қўрқмайсизми?

- Бу нарса мени албатта ташвишга солади. Лекин ташқи кўринишим салбий ролга мос бўлгани учун ва салбий образларни яратиш менда қийинчилик туғдирмагани учун ҳозирча “ёмон бола” образини яратиб юрибман. Лекин насиб қилса ижобий ролда ҳам суратга тушиш ниятим бор. Аниқроқ қилиб айтадиган бўлсам мен ижобий ролда чиқадиган фильм сценарийси ҳам тайёр. Бу фильмда мен оддийгина оиланинг ўғли, боксчи сифатида намоён бўламан.


- Актёрлар кўп китоб ўқиши керак дейишади, Сиз кўп китоб ўқийсизми, қандай китоблар ўқийсиз, умуман китоб ўқишга вақтингиз борми?

- Китоб ўқишга албатта вақт топаман. Мен бирон-бир китоб асари асосида суратга олинган фильмларни томоша қилсам, албатта ўша китобни ўқиб кўргим келади. Фильм ва унга асос бўлиб хизмат қилган асарни солиштираман.


- Мусиқа бобида ўжармисиз, ёки ҳар қандай мусиқани тинглайверасизми?

- Ростини айтсам умуман мусиқа танламайман, турли жанрдаги мусиқаларни эшитаман, фақатгина бир нарсага аҳамият бердим, чет элдалигимда мени кўпроқ ўзбек мусиқаларига тортаверади, Ўзбекистонда бўлсам аксинча чет эл мусиқасига.
- Келажакдаги режаларингиз ҳақида гапириб берсангиз.

- Ҳозирда яна бир фильм устида режа тузиб юрибмиз. Суратга олиш ишлари Малайзияда ўтказилиши кўзда тутилган. Фильмнинг қисқача сурати ёш келин-куёв асал ойи учун учиб кетаётган самолёт фалокатга учраб, улар бир бегона эркак билан кимсасиз оролга тушиб қоладилар. Менинг қаҳрамоним кўримсизгина, жисмоний тарафдан ҳам жуда алп қомат бўлмаган оддий йигит, кимсасиз оролда тирик қолиш учун ақлнинг ўзи камлик қилади. Эр-хотин билан бирга тирик қолган эркак эса жуда бақувват, тоғни талқон қиладиган қоматга эга бўлади. Орадан вақт ўтиб қаҳрамонимнинг аёли ўзини ўйлаб бегона эркак томонга ўтиб кетади. Менинг қаҳрамоним тирик қолиш учун ҳамма нарсани ўрганади, балиқ тутишни ҳам, овлашни  ҳам, олов ёқишни ҳам, қисқаси оролдаги ҳаётга мослашади. 


- Шахсий ҳаётингизда катта ўзгариш содир бўлди, оила қурдингиз, ўз маликангизни қандай топдингиз?

- Тўғрисини айтадиган бўлсам шу охирги беш йил давомида ота-онам менга рафиқа танлаш билан овора бўлишди, ундан сўнгги уч йилида инглизча қилиб айтадиган бўлсам “non stop” равишда Тошкентдаги бутун таниш-билишлар ҳам қиз қидиришди. Кўпчилик мен 15 йил АҚШда яшаб келганлигим сабаб “европалашган”, камида 2-3та олий ўқув юртини тамомлаган, 5-6та тилни биладиган қизга уйлансам керак деб ўйлаб, айнан шундай қизларни таклиф қилишган. Ростини айтсам ўз маликамни топгунимга қадар 100дан ортиқ қизлар билан учрашиб кўрдим, лекин юрагим жиз этадиганини учратмадим. Тақдирни қаранг, бир куни менга бир қизнинг суратини кўрсатишди, лекин суратдаги қизнинг дугонаси эътиборимни тортди. Қизиқиб кўрсам аёллар бутигида ишлайдиган, оддий оиланинг қизи экан, ўқимаган, лекин айнан шу қиз менинг кўнглимдан жой олди, рафиқам ўзимдан анча кичик, бор йўғи 19 ёшда.
- Оила қургандан сўнг ҳаётга қарашларингиз ўзгардими?

- Авваллари уйланганимдан сўнг АҚШга қайтиб кетаман деб ўйлар эдим. Лекин уйлангач бироз фикрим ўзгарди. Биласиз актёрлик даромадли касб эмас. Кинодан тушадиган даромадни биринчидан узоқ муддат кутиш керак, иккинчидан бу даромад барқарор эмас. Шунинг учун Тошкентда ўз бизнесимни йўлга қўйиш ҳақида ўйлаб қўйдим, Худо хохласа режаларим амалга ошса албатта бундан хабар топасизлар.

Нурмуҳаммад сизга ўз вақтингизни аямай ташриф буюрганингиз учун ташаккур айтамиз, оилавий ҳаётингизда ва актёрлик карьеранигизда улкан зафарлар тилаб қоламиз.