Аёллар 8-март байрамига қандай совға истайдилар?

Актриса Барно Қодирова: 

Аёлларга энг кўп ёқадиган совға гул бўлса керак. Оиламиз тинч, фарзандларимиз соғ бўлса мана шу биз учун энг катта совға. Шахсан мен учун катта совға бу кўпгина фильмларда барчага бирдек манзур бўладиган роллар ижро этиб, ўз касбимиздан фахрланиб юрсак дейман". 

Хонанда Муниса Ризаева:

"Мен учун муҳими бу диққат, эътибор. Энг муҳими шу. Ман хеч қачон совға танламаганман. Менга фарқи йўқ ким нима совға қилишини. Аслида аёллар учун энг катта совға бу – бахт. Фақат бахт". 

Театр ва кино актрисаси Гулхумор Абдуллаева:

"8-мартда барча аёллар кичкина бўлса ҳам эътибор хоҳлайди. Менимча аёлларнинг севимли совғаси – гул. Билмадим мен ҳеч қачон катта совға кутмайман. Лекин уйда энг эркаси мен. Чунки уйда 3та эркак бор. Турмуш ўртоғим ва икки ўғлим.

Хонанда Умидахон:

"Аёл кишига албатта энг яхши совға бу эътибор деб ўйлайман. Аёллар ва қизлар кўпинча эркаклардан катта совға кутмайдилар. Эътибор кўрсатган ҳолда битта гул ҳам совға қилсалар, бу аёл киши учун энг яхши совға бўлади. Меҳр ва эътибор катта совға ҳар бир аёл учун".

Актриса Муқаддас Саъдуллаева:

"Энг яхши совга бу - эьтибор. Аммо фақат 8 март кунигина эмас, аёл киши доим қадрлилигини, кераклигини сезиб туриши керак. Бундай эьтиборни гул, ширинликлар, турли совғалар билан ҳам билдириш мумкин, аммо шундай ҳолатлар бўладики, бир оғиз ширин сўз сени кўкларга олиб чиқади. Унинг қадр-қиммати ҳар қандай совғадан улуғроқ".

Ўзбекистонда хизмат кўрсатган актриса Дилором Эгамбердиева:

"Биринчи навбатда байрам куни мен кутаётган, менга ёқадиган инсон менга телефон қилишини жуда хоҳлайман. Кейин мен жуда қимматбаҳо совғаларни яхши кўраман. Ҳамда шундай совғани олишни истайман. Оддийликдан йироқман". 

Хонанда Дилсўз:

"Аёл киши учун кўп нарса керак. Меҳр, муҳаббат, булар биринчи ўринда. Севган ёри ва фарзандлари томонидан кўрсатилган эътибор катта совға албатта. Ҳар бир аёл киши сингари совға олишни ва ўзим ҳам совға беришни ёқтираман.

Актриса Феруза Собитова:

"Мен жуда эътибор талаб аёлман. Шу сабаб менга катта-катта совғалар жуда ёқади. Билмадим совғанинг фарқи йўқ. Энг кераклиси мен учун яқин бўлган инсондан уни олиш деб ўйлайман". 

Актриса Асал Шодиева:

"Мен асосан ўз қўллари билан қилинган совға олишни истар эдим. Агар эркак кишидан совға бўлса, у тақдирда оддий қоғозга ўз қўллари билан ёзилган мактуб олишни хохлар эдим".  

Режиссёр ва актриса Нодира Муродхўжаева:
"Менимча аёллар учун совғанинг катта кичиги йўқ. Муҳими ўша совғани сиз учун қадрли бўлган инсоннинг тақдим этишининг ўзи катта совға деб биламан. Ҳамда совға албатта чин кўнгилдан тақдим этилиши керак.

Актриса ва хонанда Динейра:

"Ноодатий тарзда қилинган ва эсда қоладиган совға бу энг яхши ҳадя. Албатта гулларсиз бу байрамни тасаввур этиб бўлмайди. Ўйлайманки энг ёмон совға бу стандартдаги совғалар бўлади. Ҳар бир аёл киши сингари мен ҳам бу байрамда совға кутаман ва ўзимнинг яқинларимга ҳам совға беришни яхши кўраман". 

Дизайнер Azucar Moreno:

"Айтишларича энг яхши совға бу, ўз қўллари билан қилинган совға. Шу сабабли ҳам менинг ҳолатимда менинг қўлларим билан қилинган совға энг яхши ҳадя".