Шерали Жўраевнинг юбилейидан

Versal ресторанида Ўзбекистон халқ артисти, Алишер Навоий номли мукофот соҳиби Шерали Жўраевнинг 70 ёшни қаршилагани муносабати билан «юлдузли» юбилей кечаси бўлиб ўтди. Кечадаги энг ёрқин лаҳзаларни фотолавҳаларга мухрладик.

Versal ресторани кирвуришининг икки тарафи устоз санъаткорнинг сурати билан безатилган.

Бундан ташқари кичик залда хонанданинг турли даврларда, турли давраларда тушган суратларидан иборат кичик кўргазма ҳам бўлиб ўтди. Ҳар бир суратга ўзига ҳос изоҳ сўзлар ҳам ёзилган эди.

Гуллар билан безатилган ва Шерали Жўраевнинг жуда ҳам катта сурати ўрнатилган махсус фотозонада, кеча сабабчиси ва келган меҳмонлар эсдалик учун суратга тушдилар.

Кечани навбати билан Муслимбек Йўлдошев, Раъно Жўраева, Фатхулла Маъсудов, Нилуфар Сотиболдиева, Анвар Азимов, Райҳон Уласенова, Жаҳонгир Шахобиддинов сингари бошловчилар олиб боришди.

Оқшомда меҳмон бўлган инсонларни ўзбек санъатининг дарғалари десак ҳам муболаға бўлмайди. Улар орасида Ўзбекистон, Қорақалпоғистон, Туркманистон халқ артисти Бобомурод Ҳамдамов, Ўзбекистон ва Қорақалпоғистон халқ артисти Ортиқ Отажонов, Ўзбекистон халқ артисти Фарруҳ Зокиров, Ўзбекистон ва Қорақалпоғистон халқ артисти Озодбек Назарбеков, Ўзбекистон халқ артистлари Гулсанам Мамазоитова, Муножот Йўлчиева, Ўзбекистонда хизмат кўрсатган санъаткорлар Оғабек Собиров, Ҳосила Раҳимова, Тожибар Азизова, Юлдуз Турдиева, Зиёда Қобилова, Собиржон Мўминов, Илҳом Фармонов ва яна кўплаб санъаткорлар бор эди.

Кино ва театр оламидан Ўзбекистон халқ артистлари Эркин Комилов, Ёқуб Аҳмедов, Лутфулла Саъдуллаев, Мурод Ражабов, Мирза Азизов, Обид Асомов, ҳамда Гулчеҳра Саъдуллаева, Муқаддас Саъдуллаевалар ташриф буюришди. Оқшомда Ўзбекистон халқ шоирлари Усмон Азим, ҳамда Хуршид Давронлар ҳам меҳмон бўлишди.

Кечани ўзига хос, такрорланмас ва энг кўп халқ артистлари қўшиқ куйлаган концерт дастури десак ҳам бўлади. Чунки юқорида номлари келтирилган барча хонандалар Шерали Жўраевни табриклаб, бисотларидаги энг яхши қўшиқларни уларга ва йиғилган меҳмонларга тақдим қилишди.

Оқшомдаги барча қўшиқлар фақат ва фақат жонли ижрода куйланди.

Хонанданинг ўғиллари Шоҳжахон Жўраев ва Зоҳиршох Жўраевларнинг биргаликда куйлаган «Отажон» деб номланган бағишлов таронаси меҳмонлар томонидан жуда ҳам яхши кутиб олинди.

Ўғилларининг қўшиғи тугаши билан ресторан бадиий марказига чиққан Шерали Жўраев узоқ йиллар худо унга фарзанд бермагани, Шоҳжахон ҳамда Зоҳиршох кўпчилик халқнинг, мухлисларнинг дуоси билан дунёга келган фарзанд эканлиги ҳақида гапириб берди. Хонанда ўғилларининг бутун умр халққа хизмат қилиб, халқнинг дуосини олиб чарчамасин, дея дуо қилди.

Қўшиқ навбати кеча қаҳрамонига келганида ҳақиқий байрам ҳам ўша ондан бошланди десак муболаға бўлмайди. Кеча жуда ҳам файзли, тароватли ва эсдан чиқмас даражада шукҳли ўтди.

Кечада чет давлатлардан меҳмонлар ташриф буюришди. Хусусан фазогир Солижон Шарипов Москвадан айнан хонандани табриклаш учун етиб келди. Бундан ташқари Хитой, Озорбайжондан, Туркия давлатларидан меҳмонлар келишди. Тожикистон халқ артисти Жўрабек Муродов хонанда ҳақида жуда ҳам илиқ, самимий фикрларни билдириб, барча меҳмонларни тик туриб қарсак чалдира олди. У «Жўражон» деб номланган қўшиқ ҳам куйлади.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.