Телебошловчи Насиба Мақсудова вафот этди

Таниқли сухандон, My5 телеканали «Дийдор ширин» кўрсатуви бошловчиси Насиба Мақсудова 8 февралдан 9 февралга ўтар кечаси 68 ёшида вафот этди. Бу ҳақда qalampir.uz сайти хабар берган.

Ўзбекистон Миллий телерадиокомпаниясида кўп йиллар давомида фаолият юритган Насиба Мақсудова Янги йил байрами олдидан суратга олиш ишларидан қаттиқ толиқиб, инсультни бошдан кечирган ва шифохонага тушган. Бир оз вақт ўтиб соғлиғи тикланаётган сухандонга шифокорлар томонидан уй шароитида даволанишга рухсат берилган. Бир неча кунлардан буён уйида даволанаётган телебошловчи Республика шошилинч тиббий ёрдам маркази шифохонасига олиб келинган. Кўп ўтмай унинг аҳволи оғирлашиб, жони узилган.

Насиба Мақсудова «Шуҳрат» медали ва «Олтин қалам» мукофоти совриндори.

Таҳририятимиз номидан Насиба Мақсудованинг оила аъзоларига чуқур таъзиямизни билдирамиз. 

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.