Янги «Локомотив» боғидан илк фотосуратлар

8 гектар вақтичоғлик, 320 ўринли ресторан, Республикамизда энг катта картодром, янги ақл бовар қилмас аттракционлар, меъморчилик ёдгорликлари, ёзги кинотеатр, сув ҳавзаси, автодром, янги «Black Bear Kofi» қаҳвахонаси шунингдек, бутун бошли иккита фудкорт.

1 август куни пойтахтимизда, Лабзак ва Зулфияхоним кўчалари оралиғида янги «Анҳор-Локомотив» маданият ва истироҳат боғи очилади. Қурилиш ишлари жадал равишда давом этмоқда ва мазкур янги боғ аллақачон овоза бўлишга улгурди. 

Боғнинг асосий афзаллиги – юртимиздаги энг катта автодром бўлиб, унинг майдони 12000 квадрат метрдан ортиқ. У бутун МДҲ давлатлари ичида бу каби узун трассага эга ягона қурилма бўлади. Ундан ташқари мазкур автодром нафақат энг узун, балки у билан фақатгина Германиядаги «Шумахер» картодроми рақобатлаша оладиган энг янги технологиялар билан жиҳозланган.

Боғнинг ёзги майдончасида фильмлар намойишлари, байрам концертлари ва кўнгилочар тадбирлар ўтказилади.

У ерда майдони 1810 кв.м. га тенг сунъий сув ҳавзаси бўлиб, унда ретро машиналар шаклидаги электр қайиқлар ва катамаранлар хизмат кўрсатади.

Канал бўйлаб ажойиб кўриниш очиладиган пиёдалар ўтиш йўли ўтади. Меҳмонларни турфа рангда жило берадиган фонарли катта фаввора, аттракционлар, автодром ва бошқа кўплаб қизиқарли ўйинлар кутади.

Шунингдек, боғ ҳудудида 4та катта кинозал, 320 ўринга мўлжалланган ресторан, болалар майдончасига эга янги «Black Bear Kofi» қаҳвахонаси ва 2та фудкорт мавжуд бўлади. Бепул автотураргоҳ меҳмонлар ҳизматида.

Биринчи «Локомотив» боғидаги каби бунисида ҳам миниатюр кўринишдаги меъморчилик обидаларини кўришимиз мумкин бўлади.

Фотосуратларга қараганда: Тошкент телеминораси, Калта Минор (Хива), Шердор мадрасаси (Самарқанд), Бобурийлар хотира мажмуаси (Андижон), Минораи Калон (Бухоро), Тошкент курантлари ва Темурийлар Давлат музейи шулар жумласидан.

Бу йил шаҳримиз янада гўзаллашмоқда, янги кўриниш касб этган Олой бозори, Hyatt Regency меҳмонхонасидан ташқари янги боғ очилиши Тошкент ва унинг аҳолиси учун Мустақиллигимиз 25 йиллиги арафасида катта совға бўлади.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.