ComedyUz: Янги йил байрамига бағишланган дастур

Тошкент Ирригация ва мелиорация институтининг фаоллар залида ComedyUz резидентларининг янги йилга тайёргарлик жараёни бўлиб ўтди.


ComedyUz резидентлари ўз чиқишларини томошабинларга ҳавола этишдан олдин, аудитория билан ҳамкорликда иқтидорларини намойиш этдилар. Унда томошабинлардан берилган саволларга резидентлар моҳирона жавоб қайтарди.


Шартлар шундай: “Ўзбек эстрада юлдузлари боғчада”, “Эстрада қўшиқларга тайёрланган роликлар”, ҳамда “Чет эл олийгоҳларининг Ўзбекистон олийгоҳларидан фарқли жиҳатлари” каби саҳна намойишлари барчага бирдек манзур бўлди.


ComedyUz резидентлари ноанъанавий тарзда, бу йилги кўринишларининг аввалида “Шоу-бизнесда йил сарҳисоби”ни турли номинациялар тарзида эълон қилди. Улар: “Минг раҳмат”, “Озгина етмади”, “Энг кўп кутилган воқеа”, “Нима ҳаққи бор”, “Йилнинг энг жонга тегдику” номинациялари, ҳамда “Йилнинг энг кўп пахта қўядиган санъаткори” номинациялари аниқланди ва уларга ҳазил тарзида диплом топширилди.

Кейин илк бор иштирок этаётган “Зарафшон” учлиги жамоаси, “Нобел” гуруҳи, “ЭБ” жуфтлиги, “Ҳасан ва Ҳусан” учлиги жамоалари ва Миршакар Файзуллаев, Нозимжон Сафаров, Ислом  Алилар ўз чиқишларини намойиш этдилар.  


Ушбу куни янги йил ҳазиллари, доим учраб турадиган таксидаги ҳолатлар, таҳририят ходимлари фаолияти, тез тиббий ёрдамда учрайдиган камчиликлар, аёл ва эркак мавзулари, баъзи бир кинолардаги кулгили ҳолатлар, қишлоқ ва шаҳар ҳаёти, шунингдек, ҳеч қачон аҳамиятини йўқотмайдиган талабалар ҳаётидан лавҳаларни томошабинлар ҳукмига ҳавола этилди.
Тадбир сўнггида ҳар бир жамоа ўзининг байрам табрикларини ҳазиллар орқали оммага тақдим этди. Уларнинг чиқишлари юқори олқишларга сабаб бўлди.

Мухлисларнинг фикрича, бу йилги ҳазиллар доимгиданда зўр бўлган. Бу эса албатта ComedyUz жамоасининг ютуғи.
Ҳақиқатдан ComedyUz резидентлари томонидан тақдим этилган ҳазиллар ортиқча бачканаликдан холи тарзда айни ҳақиқат асосига қурилган. Аудиторияга эса ана шундай ҳазиллар керак. ComedyUz резидентларининг бу дастурини албатта ойнаи жаҳонда кўришингиз мумкин бўлади.

Нозима МИЯССАРОВА,
тайёрлади.