Dance Music Fest Winter

Мусиқий анъанага айланган Dance Music Fest  халқаро фестивали яна бир бор Тошкентда бўлиб ўтди. Тадбир пойтахтимизда тўртинчи, лекин илк маротаба қишки форматда ўтказилди. Бу сафар фестивалнинг бош диджейлари туркиялик продюсер Mahmut Orhan ва белгиялик DJ Romeo Blanco бўлдилар.

Таниқли хитлар садоси остида рақс тушиш ниятида минглаб электрон ва сифатли мусиқа ихлосмандлари ташриф буюрдилар.  Янги йил кайфияти яратиш мақсадиди барча меҳмонларга Қор бобо қалпоғи тарқатилди. 

Фестиваль Roger Gunn тахаллуси билан ҳам танилган DJ Flextra'нинг сетлари билан бошланди.

Roger Gunn'нинг жўшқин мусиқасидан сўнг Taker, Cayote, KMRN ва Trace каби пойтахтимизнинг таниқли диджейлари ўз сетларини тақдим этдилар. 

Артистларининг рақсбоп треклари махсус чироқ эффектлари жўрлигида янгради. 

Тошкентга илк маротаба ташриф буюрган, таклиф қилинган диджей қозоғистонлик Cyber Mode меҳмонларни кеча хедлайнерлари чиқишига тайёрлади. 

Кечанинг энг кутилган диджейларидан бири бельгиялик Romeo Blanco бўлди. У Tomorrowland фестивалларидаги чиқишлари ва Turn Up The Love треки билан машҳурлик қозонган.    

Кечанинг бош хедлайнери эса туркиялик диджей ва продюсер Mahmut Orhan эди. У хонанда Сена Шенер билан ҳамкорликда яратилган Feel сингли билан машҳур бўлиб, мазкур трек Itunes'да биринчи поғона ва Shazam топ-чартида Ўзбекистонда биринчи ўринни эгаллаган. 

DJ Romeo Blanco, Dance Music Fest Winter хэдлайнери: «Бу менинг Ўзбекистонга илк ташрифим. Тошкент менга жуда ёқди, жуда чиройли шаҳар. Бугун мен поп, хаус, тек-хаус услубидаги трекларимни тақдим этдим. Публика ҳам менинг мусиқамни ҳис этди. Ажойиб кеча бўлди».

DJ Trace, оқшом диджейи: «Саҳнада ўз трекларимни тақдим этиш ажойиб эди. Ўтган сафарги фестиваль билан унчалик катта фарқ сезмадим, барчаси ўшандагидей юқори даражада ташкил қилинган. Энг қувонарлиси одамларнинг кўплиги ва улар қувнаш учун келгани. Қаерда чиқишнинг аҳамияти йўқ, асосийси одамлар мусиқа учун келгани».

DJ Cyber Mode: «Менга публика ёқди, улар қаерга ва нима учун келганини билади. Бугун улар менга жўрлик ҳам қилишди ва бу жуда зўр, мен мамнунман. Товушни айтиб ўтишим керак - бу ерда у жуда зўр! Мен бу ерга қайта ва қайта келишни хоҳлайман ».

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.