Нилуфар Усмоновадан альбом тақдимоти

Сокин ва шўх-шодон тароналар, гоҳо шодлик, гоҳо ғам кўз ёшлари, Юлдуз Усмоновадан сюрприз, Нилуфарнинг дугоналари ўртасида баттл ва яна кўплаб ҳис-ҳаяжонли онларни тақдим этган альбом тақдимоти қандай ўтганлиги бугунги шарҳимизда.

Хонандани қўллаб-қувватлаш учун келганлар Нилуфар Усмонованинг ширали овозини тинглаб, янги қўшиқлари ва севимли тароналаридан баҳраманд бўлдилар.


Тақдимот маросимини Нилуфар Усмонова «Бу бизнинг ҳаёт» таронаси билан бошлаб берди. Ҳар бир қўшиқ аввалида хонанда ва бошловчи таронага оид маълумотлар билан бўлишиб бордилар.

Тақдимотда иккинчи бўлиб жаранг сочган «Бегим» номли тарона илк маротаба тақдим этилди ва мухлисларнинг олқишларига қараганда, ҳаммага бирдек манзур бўлди.
Альбомнинг бош таронаси «Асрайди» ижро этилишидан аввал марҳум санъаткор Шуҳрат Нуралиев хотирланди ва кўпчилик билан бирга Нилуфар Усмонова ҳам  кўз ёшларини тутиб тура олмади. Яқин дўсти ва қадрдонини ёдга оларкан, хонанда уни ҳар доим табассум билан ёдга олишини, лекин бугун ўзини тутиб тура олмаганини баён этди.

Шу ерда бир маълумотни келтириб ўтмоқчимиз, маълум бўлишича мазкур альбомдан жой олган қўшиқларнинг деярли тўқсон фоизи марҳум Шуҳрат Нуралиев қаламига мансуб экан.

Кеча давомида нафақат томошабинларни, балки кеча сабабчиси бўлмиш Нилуфар Усмоновани ҳам сюрприз кутиб турган экан. Залга хонанданинг волидаси, ўзбек шоу-бизнесининг примадоннаси кириб келишини ҳеч ким кутмаган экан. Бу ҳодиса катта олқишларга сабаб бўлди. Нилуфар Усмонова эса кутилмаган совғадан боши осмонга етганини яширмади.

Маросимга ташриф буюрганлар альбомдан жой олган тароналар билан бир қаторда она-бола санъаткорларнинг дуэти бўлмиш  «Таралли далли»дан ҳам баҳраманд бўлишди. Устоз санъаткор қизи Нилуфар билан бир қаторда тақдимотга ташриф буюрган барча ёш санъаткорларга ўзининг қимматли маслаҳатларини бериб ўтди.   

Тантанада жаранг сочган яна бир дуэт тарона хонанданинг яқин дугонаси ва ҳамкасби Шаҳзода билан биргаликда куйланган «Майда-майда» таронаси бўлди.

Нилуфар Усмонованинг ҳамкасблари ҳам саҳнага чиқиб, унинг тароналарини куйлаб, кечага ўзгача кайфият бағишладилар. 

Хонандани бу муҳим кун билан табриклаб, уни қўллаб-қувватлаш учун дугоналари ва ҳамкасблари Шаҳзода Матчонова, хонанда Шаҳзода, Зиёда, Нигора, Дилсўз, Халимахоним, Шахло, Райҳон Уласенова, Ойхон Ифорзода, Улуғбек Раҳматуллаев ва бошқалар ташриф буюрдилар.




Тақдимотда Нилуфар Усмонованинг оила аъзолари, яқин дўстлари, касбдошлари, ашаддий мухлислари ҳамда ОАВ вакиллари иштирок этди. Маросимни бошловчи Отабек Тожибоев олиб борди.  

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.

Нилуфар Усмнова, альбом, тақдимот, Асрайди