Отажоновнинг концерт олди матбуот анжумани

Мухлислар орасида жонли ижро қироли дея эътироф қилинадиган хонанда Жаҳонгир Отажонов 28-29 октябрь кунлари «Истиқлол» санъат саройида бўлиб ўтадиган «Куз гуллари» деб номланган концерт дастури олдидан матбуот анжумани ўтказди.

Анжуман Ёшлар ижод саройининг катта залида бўлиб, унда ОАВларининг журналистлари иштирок қилишди.

Икки соатга яқин давом этган анжуманда хонанда журналистларни қизиқтирган барча саволларига жавоб берди. Хонанданинг санъат ва концерт дастури борасидаги фикрлари барчанининг ҳайратига сабабчи бўлди дейиш мумкин.

- Бир йилда икки марта концерт бериш ўзбек шоу-бизнеси учун янгилик бўлди. Нима учун йил ҳисобидан иккинчи марта концерт беришни ният қилдингиз?

- Мен ҳам давомий 5 ёки 6 кун концерт қилгим келади, лекин уч кундан сўнг овозимнинг сифати қочади. Вокалний айёрликлар билан бемалол кўп кунлик концертлар бериш мумкин, аммо бундай қилиб мухлисларни алдашни хоҳламайман. Бундан ташқари ёзда бўлиб ўтган концерт дастуримдан сўнг агар етти-саккизта янги қўшиқ ёзсам, кузда ҳам концерт бераман деб ният қилган эдим. Ҳақиқатдан ҳам ҳозир саккизта янги қўшиқ ёздим ва концерт беришга қарор қилдим. Агар кутилган натижага эришсам ҳар тўрт ойда бир маротаба концерт дастуримизни тақдим қилмоқчиман.

- Аксарият санъаткорлар концертдан айниқса жонли концерт дастуридан фақат зиён билан чиқишганини таъкидлашади. Ростдан ҳам жонли ижродаги концертга катта пул сарфланадими?

- Албатта харажат кичкина бўлмайди. Ҳар битта санъаткор учун пул сарфланмасаликнинг иложи бўлмаган харажатлар бор. Яъни саройнинг ижара ҳаққи, апаратуралар, реклама яна шунга ўхшаган харажатлар бўлади. Мен эса бошқачароқ стратегия билан ишлайман, яъни аввалги концертимга тушган мухлис кейинги концертимга ҳам келишини ҳисобга оламан ва шунга интиламан. 2 кунда 8 минг одам тушса яна шунча одам кейинги сафар ҳам қайтиб келиши учун ҳаракат қиламан, бунинг учун эса кирган томошабин концертдан маънавий озуқа, лаззат олиб чиқиб кетиши керак. Ким учундир концерт рейтингини, мавқейини кўтариш учун керак, кимдир концерт бериш учун концерт қилиш керак деб ўйлагани учун концерт тақдим қилар, мен эса қачонки ижодий янгилигим бўлсагина концерт дастуримни эълон қиламан. Концерт фаолиятимни бошлаганимга 5 йилдан кўп бўлган бўлса, бошқа санъаткорларда қандайлигини билмайману, аммо мен концертларимдан зарар қилмаганман. Бунинг сабаби эҳтимол рекламага катта пул сарфламаганимдадир, бугунги кунда фақатгина интернетда, ижтимоий тармоқларда реклама қилмоқдамиз. Катта реклама қилмасликдан ҳам анчагина маблағ тежалади.

 «Иштибоҳ» концертидан фоторепортаж

- Рекламага муҳтож эмасман деб ўйлайсизми ёки фақатгина харажатдан қочиш учун реклама қилмайсизми?

- Рекламага муҳтож эмасман дея олмайман, шунчаки концерт қилаётганимда аввалги концертимга тушган мухлис албатта янги дастуримга ҳам келишига ишонаман.

Умуман клип суратга олдирмаслигингизнинг сабаби нима?

Сўнгги вақтларда фақат жонли ижрода куйлаганимдан сўнг, студияда қўшиқ ёзаётганимиз йўқ. Қўшиқларимизни студияда ёзмаганимиздан кейин клип ҳам суратга олиб бўлмайди. Бундан ташқари менга учраган клипмейкерлар «сизга қанақа клип олиб берай», деб бировларнинг клипларини кўрсатишади. Ҳар бир қўшиғимнинг ўз адабиёти бор, афсуски улар мусиқа ёки шеърни тасаввур қила олишмайди, уларни тушунмасдан қандай клип олиш мумкин. Яқинда клип олдириш учун бир клипмейкерга мурожаат қилсам «ака сизга 60 млн сўмдан кам суммага олинган клип ярашмайди», деди. Гап пулда ҳам эмас, майли ўша пулга рози эдим, аммо у клипмейкрни қўшиғимга клип олишига ишонмадим.

Telegram’даги

расмий каналимизга обуна бўлинг!

- «Куз гуллари» деб номланган концерт дастурингизда қандай кутилмаган янгиликлар бўлади?

- Дунё саҳналаридаги концертларни кузатсак у ерда асосий куч куй билан санъат билан ўтирган мухлисни сеҳрлаб қўйишдан иборат. Мисол учун Бочелли, Шакираларнинг дастурлари ҳам анча йиллардан буён деярли ўзгармай келмоқда. Бунинг учун албатта инсон ўзига ва санъатига ишониши керак. Концертга тушган 4000 томошабин 2 соат жонли ижродаги концерт қандай ўтиб кетганини, тугаб қолганин билмай қолиш лозим. Коцнертимдаги янгиликларга тўхталадиган бўлсам, асосан бу янги қўшиқларим, режиссёрлар билан ишламайман саҳнада ички туйғуларимга ишонаман, ўз ғояларим асосида иш тутаман, олдиндан сценарий ҳам тузилмайди. Олдиндан сценарий тузиб, унинг асосида иш ҳатти-ҳаракат қилиш учун актёр бўлиш керак, менда актёрлик қобилияти йўқ. Асосан импровизация қиламан. Ҳеч қайси концертимда қилган ҳаракатларимни, гапирган сўзларимни олдиндан ўйлаб чиқмаганман. Айтиб ўтганимдек дастуримда на бошловчи, на қизиқчи, на бошқа бир қўшимча воситалардан фойдаланмайман. Бу одатимни билган мусиқачиларим ҳазиллашиб «чолғу асбобларниям ўзиз чаласизми» деб кулишади.

Йиғилган журналистлар хонанданинг концерт дастури учун умуман янги либос тиктирмаслигини эшитиб ҳайратда қолишди. Анжуманда ҳайратга соладиган саволлар ва жавоблар талайгина бўлди. 

Журналистлар томонидан хонандага жонли ижрода хоҳлаган қўшиғингизни айтиб беринг мазмунидаги саволи ва бу саволга жавобан хонанданинг «Оқ булутлар» таронасини куйлагани ҳам айни мудао бўлди. Айнан ушбу тарона билан анжуманга якун ясалди.

Telegram’даги

расмий каналимизга обуна бўлинг!

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.