Отажоновнинг концертга тайёргарлик жараёни

Хонанда Жаҳонгир Отажоновнинг йил ҳисобидан иккинчи маротаба «Истиқлол» санъат саройида 28-29 октябрь кунлари тақдим қилаётган «Куз гуллари» деб номланган концерт дастури олдидан бўлиб ўтган матбуот анжумани ҳақида аввал ҳам маълумот берган эдик.

Таҳририятимиз билан 100% жонли ижрода бўлиб ўтадиган концерт дастурининг тайёргарлик жараёнида меҳмонда бўлдик.

Ҳар бир дастурига энг камида икки ой тайёргарлик кўрадиган хонанда бу галги концерт дастурининг тайёргарлик ишларини бир ярим ойча илгари бошлаб юборган эди. Аслида асосий тайёргарлик хонанданинг ёздаги «Иштибоҳ» деб номланган концерт дастуридан бошланганини, ўшандан бошлаб янги қўшиқлар устида иш олиб борилаётгани ҳақида хонанданинг маъмурлари ҳам айтиб ўтганди.

Бу галги концерт дастурда хонанда жами бўлиб ўн олтита қўшиқ куйлашни режалаштирган бўлиб, шундан саккизтаси янги ижод маҳсули ҳисобланади.

Хонанда ҳар бир қўшиқнинг адабиётига алоҳида эътибор берган ҳолда, қўшиқ сўзларида Саъдий Шерозий, Ҳофиз Хоразмий, Маҳтумқули сингари классик адабиёт номоёндаларидан, ҳамда Омон Матжон, Муҳаммад Юсуф, Иқбол Мирзо, Бобур Бобомурод сингари шоирларнинг шеърларидан фойдаланмоқда.

Хонанданинг 3,4,5 июнь кунлари «Истиқлол» санъат саройида бўлиб ўтган «Иштибоҳ» номли дастурида куйланган «Иштибоҳ», «Ўтиб борадур», «Жиннинг ихтироси», «Муҳаббат олийжаноб», «Соат» каби қўшиқларни ҳақиқий санъат асари сифатида эътироф қилиш мумкин. Аммо хонанда ёзда бўлиб ўтган концертига узоқ вақт тайёргарлик кўра олмагани ҳақида ўша дастурнинг бошланишида мухлисларга маълум қилганди. Бу сафар эса ҳаммаси бошқача, янада ўзгача бўлиши кутилмоқда. Чунки тайёргарлик бирмунча олдин бошланган ва пухта давом этмоқда.

Суратларга муҳрланган созандалар дастурда иштирок қилаётган созандаларнинг ўндан бири дейиш мумкин. Бу созандалар асосий таркибда фаолият кўрсатади.

Агар тайёргарлик жараёнида бўлганингизда ичинггиздан «ҳар бир сўз устида соатлаб ишлайдиган хонанданинг созандаларига қойил қолиб, уларнинг жонига тўзим берсин», деган фикрлар ўтарди.

Ҳақиқатдан ҳам хонанда ҳар бир сўз, шеърий мисра устида узоқ ўйлаб, созандалар билан фикрлашиб, тортишиб ишлар экан. Мисол учун биз борган кунимиз хонанда Саъдий Шерозийнинг шеъри устида ишлаётиб, ўша қўшиқдаги бир байтни камида 7-8 маротаба қайта-қайта такрорлаб машқ қилди. Ҳолбуки бу қўшиқ устида бундан олдин ҳам анча вақт ишлангани маълум бўлди.

Жонли ижро жаҳонгирининг дастурда куйлаётган ҳар бир қўшиғи тараққиёт босқичида. Яъни тайёргарлик жараёнининг ҳар бир кунида янгича ғоя, фикрлар қўшиқ мусиқасини янгилаб бормоқда. Аслида ҳам ҳақиқий ижодкор, ҳақиқий санъат асари доимий ўсишда бўлсагина мангуликка дахлдор бўлиши, асрлардан асрларга ўтиб инсонларни эзгуликка чорлаши мумкин.

Бу тайёргарлик жараёнини кўриб, 28-29 октябрь кунлари хонанда барчани ҳайратлантира оладиган дастурни тақдим этишига ишончимиз ортди.  

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.