Шарқ гуруҳидан тез орада янги клип

Шарқ гуруҳи аъзолари Сарвар ва Татьяна қизғин ижод қилиш билан банд. Куни кеча улар «Тошшаҳарнур» павилионида янги ёзги шўх, рақсбоп «Денгиз» қўшиғи учун клип ҳам суратга олишди.

Мазкур қўшиқ ҳам ўзбек, ҳам рус тилида ижро этилган. «Денгиз» қўшиғигининг сўзи Икром Навога, «Море» қўшиғининг сўзи эса Ольга Евсеевага тегишли бўлиб, қўшиқнинг мусиқий сайқали Зарина Расулова томонидан амалга оширилади.

Рангларга бой тарзда ишланган клип трек кўринишида бўлиб, сценарий муаллифи ва режиссёр Тимур Примқулов. Унда Reginight Show ансанблининг моҳир раққоса ва раққослари иштирок этган.

Эслатиб ўтамиз, грим устаси ва либослар бўйича дизайнер Лидия Андре. Монтаж ишлари ниҳоясига етганидан сўнг, клипни бизнинг сайтимиз орқали кўришингиз мумкин.

Бундан ташқари Шарқ гуруҳи аъзолари бизга кейинги ижодий режалари ҳақида ҳам гапириб бердилар. Уларда ижодий янгиликлар жуда кўп. Лекин барчасини ошкор этишни исташмади. Сабаби сирли бўлса, мухлисларга янада қизиқроқ бўлишини айтишди.

Бироқ «Денгиз» қўшиғи ва унга ишланган клип мухлислар эътиборига ҳавола этилгандан сўнг, Шарқ гуруҳи «Қаро кўзлар» номли шўх қўшиғи устида ишлашни ният қилганлар. Бу ҳали ҳаммаси эмас. Мустақиллиқ арафасида ҳам ўзгача, ноанъанавий Ватан мадҳини куйловчи қўшиқ яратишни режалаштиришган. Демак, бизни кузатишда давом этинг.

 

 

 

 

 

 

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.