Шаҳар Муз Майдони Очилиши ва Ягудин Ташрифи

Совуқ ҳавога қарамай, шаҳар муз майдони очилишига кўпгини шаҳар аҳли ташриф буюрди. Атроф-муҳит эртакона тарзда безатилган бўлиб, ёрқин безаклар, ёритгичлар театр фонида жуда гўзал кўриниш ва янги йил мўъжизасини яратди. 

Марказий муз ва концерт майдони 7 февралга қадар ишлайди. Шу давр ичида  Dance Music Fest Winter мусиқа фестивали, Iosis Fest рок-фестивали, Tashkent Rap Festival рэп-фестивали, шунингдек хоккей бўйича ёшлар чемпионати ва музда рақс шоуси каби тадбирлар ўтказилиши режалаштирилган. 

Муз майдони очилишида меҳмонларни Ўзбекистон Ёшлар театри раҳбари Хасан Салихов қутлади. Саҳнага сўз учун Тошкент шаҳар ҳокими Жаҳонгир Ортиқхўжаев, россиялик спортчи Алексей Ягудин, Artuz Promoution асосчиси Музаффар Сидиқовлар ҳам чиқдилар.

Алексей Ягудин, Ўзбекистон Республикаси Туризмни ривожлантириш давлат қўмитаси номидан Амир Искаков исмли болакайга махсус спорт кийими ва инвентарини совға қилди. Амир хоккей формасини сотиб олиш учун онасига ишлашга ёрдам берган ва бу ижтимоий тармоқларда муҳокама қилинган. Бу оқшом Амир учун ўзгача ва сеҳрли тарзда кечди. 

 

Хусан Салихов: «Қишки спорт турларига қизиқиш уйғотиш учун яратилган бу муз майдони, аминманки, пойтахт аҳли ва меҳмонларига кўпгина қувончни баҳш этади. Бизнинг шаҳримиз учун бу ноёб лойиҳа бўлиб, спорт ва мусиқани ўзида уйғунлаштиради».

Тадбирнинг расмий қисми якунига етгач, музга спортнинг қишки ва мураккаб техник турлари бўйича Республика олий спорт маҳорати мактаби тарбияланувчилари ўз намойишлари билан чиқишди. (Мураббийлар: Ирина Сазонова, Элитта Аванесян ва Андрей Дрыганов).
 

Кечанинг махсус меҳмони Россиянинг фахрий спорт устаси, фигурали учиш бўйича 2002 йил Олимпиада ўйинлари чемпиони, тўрт карра жаҳон чемпиони, уч карра Европа чемпиони Алексей Ягудин бўлди. 

 

Алексей Ягудин:  «Бу фақатгина бошланиши. Россияда ҳам шундай ҳовлидаги майдонлардан бошлаганимизни хотирлайман. Кейинчалик йилдан йилга улар кўпайиб борди. Айнан шу тарзда анча жиддий ва профессионал даражага чиққанмиз. Ўйлайманки, айнан шундай чемпионлар туғилади. Оз-оздан «Спорт» деб аталмиш чиройли манзара йиғилиб боради».

Алексей Ягудин «Қиш» номли дастур билан чиқиш қилди. Ушбу дастур билан у Солт-Лейк-Ситида 2002 йилда Олимпиада чемпиони бўлган. У дастурни ажойиб тарзда ижро этди. 
 

Кейин эса музга Ўзбекистон болалар миллий хоккей терма жамоаси таклиф этилди. Чиқиш, хоккей анъаларига кўра «жамоалар кураши» билан якун топди. Албатта тайёргарлик чиқишлари доирасида.